Prishtinë,
27 tetor 2022 – Kryesuesi i Këshillit Gjyqësor të Kosovës (KGJK), Albert Zogaj,
Kryetari i Gjykatës Komerciale, Mahir Tutuli, Kryetari i Komisionit për
Administrimin e Gjykatave, Fahret Vellija dhe gjyqtarja e Dhomës së Shkallës së
Dytë në Gjykatën Komerciale, Saranda Bogaj-Sheremeti, kanë pritur në takim
Këshilltaren e Përgjithshme të USAID-it, Margaret Taylor me bashkëpunëtorë.
Pjesë e këtij takimi ishte edhe Drejtori i Projektit të USAID – Drejtësia
Komerciale, Christopher Thompson.
Qëllimi i këtij takimi
ishte që znj.Taylor dhe ekipi i saj të njoftohen me reformat, funksionalizimin,
sfidat dhe objektivat e Gjykatës Komerciale.
Kryesuesi Zogaj,
falënderoi këshilltaren znj. Taylor për përkushtimin, angazhimin dhe përkrahjen
e vazhdueshme që ka treguar USAID për sistemin gjyqësor.
Me këtë rast, Zogaj
shprehu kënaqësinë e vlerësimit nga Indeksi i Sundimit të Ligjit (ISL) për
vitin 2022, ku Kosova radhitet si vendi që ka shënuar progres në sundimin e
ligjit në Evropë dhe i dyti në botë.
Kjo gjykatë, ka rol të
rëndësisë së veçantë për zhvillimin e një sistemi të qëndrueshëm të drejtësisë
që ndërlidhet me të bërit biznes, si një domosdoshmëri që siguron sektorin e
biznesit për qasje të shpejtë dhe efikase në drejtësi, ka potencuar Zogaj, duke
shtuar se funksionalizimi i kësaj gjykate do të ndihmojë në krijimin e një
ambienti më të mirë për bizneset vendore, por edhe për investitorët e huaj.
Nga ana tjetër, znj.
Taylor, u shpreh e gatshme për vazhdimin e mbështetjes së USAID-it me qëllim që
të realizohen arritjet e objektivave për t’ju siguruar qytetarëve qasje në
drejtësi, me fokus të përmirësimit të kapaciteteve të kësaj gjykate, qasjes në
shërbime cilësore, si dhe rritjes së besueshmërisë në sistemin e drejtësisë.
Po ashtu, znj. Taylor
tha se kjo vizitë është shumë speciale për të, sepse bëhet fjalë për një shtet
që i jap shumë rëndësi transparencës së sistemit të drejtësisë, Taylor,
gjithashtu falënderoi KGJK-në për punën e deritanishme dhe bashkëpunimin e
vazhdueshëm.
Ndërkaq, Kryetari
Tutuli, njoftoi të pranishmit mbi zhvillimet dhe sfidat aktuale të Gjykatës
Komerciale, veçanërisht hapat dhe përpjekjet e ndërmarra në lidhje me
plotësimin e vendeve vakante, si dhe strukturën organizative. Ai tha se,
funksionalizimi i plotë i kësaj gjykate është prioritet kryesor si për sistemin
gjyqësor, ashtu edhe për integrimin evropian të Kosovës. Tutuli, gjithashtu
theksoi se partnerët nga USAID-i janë çelësi i suksesit në procesin e
funksionalizimit të Gjykatës Komerciale.
Drejtori i Projektit
të USAID – Drejtësia Komerciale, Christopher Thompson, tha se puna efektive e
menjëhershme e Gjykatës Komerciale pas themelimit të saj, është sukses i madh
dhe se ndihet me fat që ka qenë pjesë e procesit të themelimit të kësaj
gjykate.
Në fund të këtij
takimi, bashkëbiseduesit shprehen gatishmërinë dhe vullnetin për
vazhdimin dhe thellimin e bashkëpunimit për realizimin e aktiviteteve të
përbashkëta.
0 Comments