INVICTUS

 INVICTUS : Uilliam Ernest Henli [William Ernest Henley]. Përkthyer nga

Ridvan Peshkopia

INVICTUS

Prej kësaj nate që kam përmbi

Skëterrë e errët dhe e pasosur

Falënderoj cilëndo perëndi

Për këtë shpirt timin të pamposhtur

As nuk u tuta as ia dhashë vajit

Në kurthet ku rasti më mbart

Përmes tallazeve të fatit

Me kokë gjakosur por gjithmonë lart

Përtej gjithë lotëve e dhimbjeve

Është hija e tmerrit tej e tej

E prapë kërcënimi i viteve

T'patrembur m'gjeti e do t'më gjejë

Sado e ngushtë të jetë një portë

Sado dënime ligji të ketë

Për fatin tim unë vetë jam zot

Për shpirtin tim komandoj unë vetë.